प्रदेशराजनीतिसमाचार

१ नम्बर प्रदेशको नामाकरण बहस शुरु, सांसदहरुबीच चर्को मतभेद

बिराटनगर,

१ नम्बर प्रदेशको नामाकरण बारे सांसदहरुबीच चर्को मतभेद भएको छ । हिउँदे अविधेशन सुरु भएसँगै प्रदेश १ को नामाकरणको बहस शुरु भएको हो । प्रदेशसभा गठन भएको २ वर्ष पुग्न लागिसक्दा पनि टुंगिन नसकेको नामाकरणको विषयमा सांसदबीच मतभेद देखिएको छ ।
गत बिहीबारबाट शुरु भएको प्रदेशसभाको हिउँदे अधिवेशनमा प्रदेशको नामाकरणको विषय पनि उठेको छ ।

स्थायी राजधानीको विषय टुंगिसकेकोे यस प्रदेशमा नामाकरणको विषयमा भने सांसदहरुमा मतमतान्तर व्यापक छन् । कतिपय सांसदहरु प्राकृतिक सम्पदाका आधारमा प्रदेशको नामाकरण गर्नुपर्ने अडानमा छन् भने कोही जातीय पहिचानको आधारमा गर्नुपर्ने पक्षमा उभिएका छन् ।

जातीय पहिचानको आधारमा किराँत, लिम्बुवान, खम्बुवानलगायतका नाम चर्चामा छ तर त्यसमा पनि चर्को विवाद छ । भूगोलका आधारमा प्रदेशको नामाकरण गर्नुपर्ने भन्दै सगरमाथा वा कोशीलगायतका नाम आएका छन् । संघीय लोकतान्त्रिक राष्ट्रिय मञ्च संसदीय दलकी नेता विष्णुमाया तुम्बाहाम्फे दुईतिहाइको बलमा जनताको मर्मविपरीत निर्णय गर्न नहुनेमा जोड दिए ।

त्यस्तै संघीय समाजवादी पार्टीका संसदीय दलका नेता जयराम यादव पनि जातीय पहिचानको आधारमा नामाकरण गर्नुपर्ने माग राखे । यो विषयमा प्रदेशसभाभित्र मात्र होइन बाहिर पनि पहिचानवादीले मोर्चाबन्दी शुरु गरेका छन् । स्वय सत्तारुढ नेपाल कम्युनिष्ट पार्टी निकट लिम्बूवान राष्ट्रिय मोर्चा, किराँत राष्ट्रिय मुक्ति मोर्चा, कुमार लिङदेन नेतृत्वको संघीय लोकतान्त्रिक राष्ट्रिय मञ्च, समाजवादी पाटीसहितका मोर्चामा सामेल भएका छन् ।

सरकारलाई दबाब दिन पहिचानवादीहरू एक स्थानमा उभिएका उनीहरुले मुख्यमन्त्री शेरधन राईलाई भेटेर प्रदेशको नाम ‘लिम्बूवान–किराँत’ राख्न माग गदै ज्ञापन पत्र समेत बुझाइसकेका छन् । तर प्रदेशका मुख्यमन्त्री शेरधन राईले सबै पहिचान र भूगोललाई समेट्ने गरी नाम टुंगो लगाउने बताउँदै आएका छन् ।

Related Articles

Leave a Reply

Your email address will not be published.

Back to top button